Во преполната судница во КПУ Идризово, под засилени безбедносни мерки денеска започна судењето за пожарот во дискотеката „Пулс“ во Кочани. Покрај обвинетите, присутни се и роднини на 63 жртви кои го загубија животот во несреќата што се случи на 16 март, претставници на обвинителството, на одбраната, новинари.
Судијката Дијана Груевска-Илиевска, која го води процесот за пожарот во дискотеката „Пулс“ во Кочани, денес на првата седница изјави дека ќе бидат изнесени сите докази, освен некои што ги сметаат за неважни, за да не се одолговлекува постапката.
„Можеме да гарантираме дека ќе бидеме максимално транспарентни и дека ќе ја информираме јавноста“ рече судијката на денешниот почеток на судењето за катастрофалниот пожар во дискотеката „Пулс“ во кочани во која загинаа 63 претежно млади лица, а уште 200 беа повредени од кои некои со трајни последици.
„Не можам да ветам брзина. Може да се направи грешка. Колку ќе трае судењето никој не знае, апелирам на трпение и дисциплина“, рече судијката. „Ќе дојдеме до правдата“, вети Груевска.
На судењето се присутни повеќе од 50 родители на загинатите во пожарот и 30-ина домашни медиуми. Акредитирани се и странски медиуми како БМТ, ТРТ, Франспрес, Ројтерс, Асошиејтед прес, Андалузија и други.