„Денес покажуваме дека нашето стратегиско партнерство со САД е на одлично ниво. Упатувам огромна благодарност на целиот тим на американската амбасада во Македонија. Со нивната лична заложба ја обезбедуваме оваа значајна опрема, која е донирана од страна на американската држава. Имаме опрема којашто е донирана на единицата за откривање и демонтирање на експлозивни средства или „бомбашката единица“, којшто е клучна за Македонија во рамки на професионалното делување на МВР. Се работи за најсовремена опрема во вредност околу милион евра и сите припадници на единицата веќе имаат поминато соодветна обука, организирана од амбасадата. Со ваков тип на опрема се штитат животите и на граѓаните и на професионалците во МВР“, нагласи министерот Тошковски.
Се работи за високософистицирана опрема, вредна околу еден милион евра: роботи за справување со импровизирани направи, неексплодирани минско- експлозивни и други убојни средства, бомбашки одела, телескопски манипулативни раце, детектори на експлозивни средства, фибер оптички камери, рендген апарати за откривање на експлозивни средства, специјализирано возило за пренос на опремата и обуки на припадниците на Едницата за откривање и демонтирање на екслпзивни средства и направи, за користење на опремата преку програмата АТА.
Вршителот на должност амбасадор на САД во Македонија Никол Варнс посочи дека оваа донација ја претставува заедничката посветеност кон засилување на капацитетите на министерството за одговор на вакви видови закани, заштита на заедницата и животите на граѓаните.
„Заедничката посветеност на министерството и амбасадата е пресудна во успехот на нашите две земји и се радувам и на идната соработка. Припадниците на Одделот за минско експлозивни средства во нивната работа се исправени пред неверојатна опасност. Тие се движат кон опасноста, за да бидат другите безбедни. Ги заслужуваат најквалитетните алатки и опрема, да ги извршуваат своите обврски безбедно и ефективно. Ова возило и опрема ќе го зголемат нивниот капацитет да ги детектираат, проценат и неутрализираат заканите од експлозиии, со поголема брзина, прецизност и координација. Денешната поддршка го потенцира нашиот заеднички интерес за безбедност и стабилност. Кога капацитетите на Република Македонија се засилени, кога заканите се идентификувани и соодветно и брзо разрешени, придобивките се и за двете нации. Силното двострано партнерство како нашето е клучно да обезбеди безбедност и да се справи со предизвиците, пред тие да ескалираат. Тоа го прават партнери од доверба.“, нагласи вршителката на должноста американска амбасадорка во Македонија Никол Варнс.