Само една недела по поставувањето и свеченото палење на новогодишната декорација на плоштадот „Македонија“ во Скопје (на 15 декември 2025 година), дел од украсите веќе се оштетени и украдени.
Од плоштадот е украдена една помала новогодишна елка, додека целосно е уништена макетата во форма на адвент-календар, која беше поставена како дел од празничното уредување на централното градско подрачје.
Засега нема официјални информации од Град Скопје или од полицијата дали случајот е пријавен и дали ќе се покрене истрага за утврдување на одговорноста за вандализмот и кражбата.
Новогодишната декорација на Скопје оваа година чинеше околу 53.000 евра и вклучуваше 13-метарска главна елка, 3Д фигури (мечиња и подароци), големи светлосни ѕвезди, „ѕвездено небо“ од лед-мразулци и други елементи.