„Па ја погребаа партијата за малку. На издишување беше. Па ние сите во изминативе две години тешко работиме, консолидираме и они сега ќе кажуваат како треба. Кога ќе кажуваат? Кога ги вадиме најголемите скандали на власта. Па кој е наивен? А ако сакаат да се вклучат, сега ги имаме изборите во Брвеница. Ќе ги ставиме во распоредот, па нека помогнат, ако сакаат вистински да ѝ помогнат на партијата. Ако не, нека ми се тргнат од патот, затоа што ќе ги изгазам како шлепер жаба, да ги потсетам нешто од нивното време“, рече Филипче.
Во обраќањето, Филипче нагласи дека својата работа во партијата ја извршува со истата посветеност и сериозност со која работел и како лекар и како министер за здравство.
„Имаат работа со Венко Филипче, којшто сè што работи, работи професионално, посветено, многу сериозно, како што го работиме овде, и најдобро што можам. Исто како што сум работел и на Клиниката за неврохирургија и во Министерството за здравство, така и тука, и да знаете дека ќе победиме. Ќе победи нашата политика, затоа што сме на исправната страна“, порача Филипче.
Во наплив на нервоза во неговите обраќања во одговор насочен директно кон своите довчерашни „другари“ и сопратијци кои децении беа „носечки кадар“ и врвни експоненти на партијата, тој со израз на лицето како очајник им испрати порака соодветна на ниво на речник од маалска кооперација: „Тргнете ми се од патот или ќе ве прегазам како шлешер жаба!“ – рече во лутина Венко од собраниската прес-говорница, нанесувајќи му со непристојниот речник голем срам и на законодавен дом.