„Цел живот ги слушав приказните од дедо ми Петруш …Знам сѐ за Илинденското востание, за дедо ми – Никола Карев – претседателот на Крушевската Република. Живо се сеќавам и на пренесувањето на неговите останки во 1953 година во Македониумот, вели 78-годишниот внукот на претседателот на Кружевската република.
Откако од осум години останал сирак, Трајко постојано бил со својот дедо Петруш.
„ Седум години, дење и ноќе, бев со дедо ми Петруш, најстариот брат на Никола Карев. И сите приказни ми ги раскажуваше, а јас желно ги слушав и ги чував во себе. Дедо ми Петруш беше жив илинденец. Секој втор ден бевме „на терен“. Ми покажуваше места, локалции, како било за време на Илинденското востание. Дедо ми Петруш живееше 95 години. Живееше до 1963 година кога јас имав 14 години. Го паметам, секој ден носеше бастун во десната рака, а со левата ме држеше мене за рака, раскажува Трајко Карев, токму наспроти споменикот на неговиот славен дедо, Никола Карев.
„Тоа се времињата. Ама во Крушево имаме почит. Секој ден ме поздравуваат крушевчани, разговараме и низ кафе пак ги враќаме сеќавањата. Крушево не може без илинденските сеќавања. Ниту ние без херојско Крушево“, вели тој во разговор за МИА
Трајко споменува дека Никола Карев и Христо Узунов биле против предвременото востание на Смилевскиот конгрес. Но, ги надгласале. Сепак, почнал да ги подготвува сите села за востанието. Ги организирал со писма.
„ Ноќта на 1 август, на полноќ, организира да ја нападнат касарната во Крушево додека бијат камбаните. Но, сето почнало 15 минути пред полноќ“, вели Трајко Карев.
Никола бил целосно предаден на Републиката. И предвидел кога ќе се одмаздат Турците. Затоа Штабот распределил 22 товари брашно и три товари сол скриени на местото викано „Павле чешма“. За да не страда населението.