Коалицијата Вреди официјално поднесе иницијатива до Државната комисија за спречување на корупцијата (ДКСК) со барање за истрага во врска со наводната афера околу фирмата „АС Сењак“ и поврзаноста на политичката елита на ДУИ со српската држава. Вреди бара да се истражи дали оваа операција ги загрозува националниот интерес и финансиската стабилност на државата. „Мислеа дека вистината ќе исчезне, ако молчат. Мислеа дека народот ќе заборави, ако ги игнорираат фактите. Но, се излажаа. Ние не забораваме. Од денес оваа афера добива и институционална димензија.“ – изјави Беким Фазлиу, претставник на коалицијата Вреди.
Според Фазлиу, аферата се однесува на продажбата на акции од семејството на Али Ахмети преку „АС Сењак“ на Алта Банка од Белград, банка што е под контрола на српскиот претседател Александар Вучиќ. Истите акции, додава тој, претходно биле купени од поранешниот шеф на УБК, Сашо Мијалков, што го потврдува постоењето „криминална оска“ меѓу Мијалков, Ахмети и Вучиќ. „Фирмата ‘АС Сењак’ функционира како проточен бојлер за перење пари од тендери, доделени од институции на ДУИ, за да се тргува потоа со пари и акции зад грбот на граѓаните. Ова не е бизнис, туку предавство на националните интереси.“ – нагласи Фазлиу.
Во иницијативата, Вреди бара од ДКСК да истражи: (1) Дали Али Ахмети и функционери на ДУИ ги злоупотребиле службената положба и политичкото влијание за реализација на зделката?; (2) Каква е заднината на финансиските трансакции меѓу фирмата на Мијалков и семејството на Ахмети; (3) Дали тендерот од 1,5 милион евра, доделен на „АС Сењак“ само шест дена по продажбата, е награда за политичка услуга; (4). Дали оваа операција ги загрозува националниот интерес и финансиската стабилност на државата?
„Ова е тест за институциите. ДКСК треба да покаже дали работи за граѓаните, или е само декор на криминалната власт. Нивниот молк нема да нè спречи. Вистината ќе излезе на виделина. Правдата ќе ги стигне сите вмешани во оваа афера против државата.“ – истакна Фазлиу.
Иницијативата на Вреди уследува по пет дена молчење на ДУИ и Али Ахмети. Според Фазлиу, тоа е „најгласното признавање на вината во оваа афера“.