Костадиновски одговори на повеќе актуелни теми поврзани со одлуките на Судот, положбата на судската и уставно-судската власт, Законот за употреба на јазиците, Колективниот договор за култура, уставната тужба, политичките притисоци врз Судот и реформите што, според него, се неопходни за зајакнување на институцијата. Тој упати јасна порака до јавноста во врска со Законот за употреба на јазиците за кој се води предмет во Судот, нагласувајќи дека неосновано се создаваат стравови и политички тензии околу ова прашање. Според него, Уставниот суд нема намера да ограничува права, туку напротив – да ги заштити и да ги унапреди.
„Сакам да упатам еден апел бидејќи гледам премногу се манипулира со ова прашање. Никој нема да го чепне албанскиот јазик. Уставниот суд постои за да помогне во уставно-загарантираните права дали се јазични, дали се соодветна правична застапеност, да бидат заштитени а не да ги укине. Тие се уставна категорија така што не ги прифаќам никако тие квалификации дека некој сака да го укине, да ја намали употребата, или да го загрози албанскиот јазик.Тоа е апсолутно неточно!“ – нагласува Костадиновски.
Тој укажува дека одлуките на Судот ќе имаат за цел да ја олеснат практичната примена на правата. „Нашите одлуки можат само да ја олеснат примената на албанскиот јазик така што нашите согрѓани Албанци да бидат спокојни никој нема да го чепне албанскиот јазик“
Костадиновски посочи дека мислењето на Венецијанската комисија не треба да се толкува селективно, бидејќи содржи и пофалби, но и забелешки. „Прво Венецијанската комисија кажува за разлика од законот од 2008 година…овој закон од 2018 година значително ја проширува употребата на албанскиот јазик, значително и тоа Венецијанската комисија вели дека тоа е за пофалба дури и вели се поздравува волјата на властите во Македонија за унапредување на јазикот на заедниците и тоа навистина за пофалба, но Венецијанската комисија вели одредени одредби во одредени области се оди предалеку“. – укажува Костадиновски.