Казна во Солун, сметка на граница – новиот грчки систем

Грција воведува автоматски систем за следење на сообраќајните прекршоци, кој ќе им го блокира излезот од земјата на странците со неплатени казни.

Министерството за дигитална управа на Грција објави дека ќе поврзе сообраќајна полиција со царинските служби преку единствен дигитален систем. При излез од земјата, на граничните премини автоматски ќе се прикажуваат сите неплатени казни за сообраќајни прекршоци извршени во Грција, објави Никана.гр.

Без разлика дали прекршокот е евидентиран од полициски службеник на лице место или од сообраќајни камери (дури и без ваше знаење), системот ќе го регистрира во реално време. На пример, ако камера во Солун ве сними како поминувате на црвено, казната веднаш ќе биде внесена во базата и ќе се појави на граничниот премин – пред вас да пристигнете таму.

Излезот од земјата ќе биде блокиран додека казната не се плати на лице место.

Оваа мерка, според грчките власти, е неопходна. Годишно се издаваат казни во вредност од 100 до 110 милиони евра, но се наплатуваат само околу 40 милиони.

Властите истакнуваат дека системот ќе обезбеди еднаков третман за сите возачи и значително ќе ја подобри сообраќајната дисциплина и безбедност.

За споредба, Србија од 13 ноември воведува дигитално возачко досие.