Голем проток на возила денеска е забележан на граничниот премин Ќафасан. Според информациите, редиците се создадени поради зголемената потреба за купување нафта и храна по пониски цени, кои пораснаа и во Албанија, но и низ целиот свет поради војната во Иран.
Од снимките објавени од „Еуроњуз Албанија“ се гледаат долги редици возила. Според извештаите, граѓаните потребувале повеќе од два часа за да преминат од Албанија кон Македонија. Слична ситуација е пријавена и на граничниот премин Какавија со Грција.
Посочуваат дека цените на горивата во Албанија се повисоки отколку во Македонија. На пример литар дизел во Албанија е 2,2 евра.
Инаку, за утре во Скопје е најавена вонредна владина седница, на која премиерот Христијан Мицкоски најави дека ќе се намалат акцизите за горивата, со цел да се спречи значително поскапување.
Видеото може да го погледнете тука.
„Во моментот немаме никакви индиции дека би било потребно воведување ограничувања од аспект на волумен, за разлика од тоа што направија некои земји – членки на Европската Унија. Напротив, голем број граѓани од соседните земји доаѓаат кај нас и ги полнат резервоарите на своите возила“, рече Мицкоски во изјава за медиумите.
На прашање дали постои можност дел од препораките на ЕУ за штедење на гориво да се применат, премиерот одговори: „Имаме доволни количини, па засега нема никаква потреба за тоа.“