Грчкиот министер за одбрана Никос Дендиас изјави дека површинскиот дрон летало претставувало закана за бродоградбата и можело да резултира со цивилни жртви, објави Си-Ен-Ен Грција
„(Украина) мора да ни гo упати своето најдлабоко извинување. И покрај извинувањето, мора да ни даде апсолутни гаранции дека ова нема да се случи повторно во овој регион“, нагласи Дендиас.
Според него, Грција „нема сомнение“ дека станува збор за украински поморски дрон. Тој исто така изјави дека грчката страна го знае типот на дрон, каде е произведен и што прави.
Медиумите забележуваат дека Атина е „сериозно загрижена“ за инцидентот, бидејќи грчката влада верува дека во Средоземното Море се појавила „сериозна закана за безбедноста на пловидбата“.
Портпаролката на грчкото Министерство за надворешни работи, Лана Зохиу, го нарече овој случај „особено сериозен инцидент“. Атина моментално ги чека резултатите од истрагата на Генералштабот на вооружените сили пред да преземе официјални мерки.
„По добивањето на официјалниот заклучок од Генералштабот на вооружените сили, Министерството за надворешни работи ќе преземе потребни мерки и официјални чекори на билатерално и меѓународно ниво“, нагласи Зохиу.
Во исто време, ова прашање веќе беше дискутирано за време на разговорот меѓу грчкиот министер за надворешни работи и неговиот украински колега, Андриј Сибиха.