Фудбалерите на Шкендија кратко го живееја сонот за бараж за Лигата на шампионите, пред да бидат торпедирани од Карабах со 5:1 во реваншот во Баку и со тоа да се простат од елитното клупско натпреварување на стариот континент.
Македонскиот првак поведе преку сенегалскиот напаѓач Фабрис Тамба во 10. минута и во тој момент ја анулира негативата од Скопје, но само шест минути подоцна шампионот на Азербејџан израмни со автоголот на дефанзивецот Клисман Чаке од Албанија.
Шокот ги чинеше тетовските „црвено-црни“ уште еден погодок во нивната мрежа само по две минути, кога Бразилецот Кади Борхес ја најави канонадата до крајот на полувремето, во која учествуваа и Нариман Ахунѕаде во 33. минута, и Марко Јанковиќ од пенал во 35. минута.
Точка на резултатот стави Леандро Андраде во 59. минута.
Шкендија продолжува во плејофот за Лигата на Европа против поразениот од двомечот Ференцварош – Лудогорец.