Британски припадницина организираниот криминал од албанско потекло организираат нелегални преминувања преку Ламанш со луксузни јахти, открива британскиот таблоид „Сан“ по детална тајна истрага.
Надоместокот за превозот е околу 15.000 фунти, а за плаќање се прифаќа исклучиво готовина, истакнува весникот.
Криминалните банди дури и ги рекламираат ваквите патувања на социјалните мрежи преку видеа што личат на реклами за туристички патувања.
Во видеата, криминалците ветуваат „удобно и безбедно“ нелегално преминување на британската морска граница.
Клиентите најчесто се закоравени криминалци, претходно осудени во Обединетото Кралство, а потоа депортирани од таа земја.
Таблоидот проценува дека 4.614 претходно депортирани осудени криминалци се вратиле во Обединетото Кралство на овој начин.
Најмалку 723 криминалци биле депортирани два или повеќе пати.
Британското Министерство за внатрешни работи потврдува дека бројот е секако поголем, бидејќи криминалците обично користат сосема различни фалсификувани документи со нов идентитет по враќањето во земјата.
Албанците сочинуваат повеќе од една третина од осудените и депортираните криминалци кои се враќаат во Велика Британија.
Весникот објаснува дека Британската крајбрежна стража се фокусира на гумени чамци, додека јахтите минуваат непречено со многу помалку контрола и често се закотвуваат во приватни или мали, речиси незабележливи марини.