Наставници, машиновозачи, фармацевти и болнички персонал се меѓу работниците за кои се очекува да се приклучат на националниот штрајк во Франција денеска, против најавените кратења на буџетот, објави Ројтерс.
Штрајкот најтешко ќе ги погоди јавниот превоз, образованието и здравството. Во железничкиот транспорт се очекува да сообраќа само секој втор воз и секој трет регионален воз. Во Париз, метрото нема да сообраќа надвор од шпицот…
Во основните училишта, секој трет наставник ќе штрајкува, а 98% од аптеките во Франција се придружија на мобилизацијата, што дополнително ќе го комплицира секојдневниот живот на граѓаните.
Синдикатите бараат повеќе трошење за јавни услуги, повисоки даноци за богатите и отповикување на непопуларната промена во државните пензии.
Социјалните немири доаѓаат во време кога претседателот Емануел Макрон и неговиот новоназначен премиер Себастијан Лекорну се соочуваат со политичка криза и притисок да ги ограничат финансиите во втората по големина економија во еврозоната.
Извор од Министерството за внатрешни работи изјави дека се очекува до 800.000 луѓе да учествуваат во штрајковите и протестите.
„Работниците што ги претставуваме се лути“, изјавија главните синдикати во земјата во заедничко соопштение, отфрлајќи ги „бруталните“ и „неправедни“ фискални планови на претходната влада.
Министерот за внатрешни работи Бруно Ритело изјави дека ќе бидат распоредени 80.000 полицајци и жандармери.
Екипи за борба против немири, беспилотни летала и оклопни возила ќе бидат достапни за да се спротивстават на она што Ритело го опиша како можна саботажа и обиди за блокирање на разни локации претходно во текот на денот.
Тој исто така рече дека очекува некои насилни демонстранти да се обидат да се вклучат во конфронтации со полицијата.
И покрај предвидениот хаос, повеќе од половина од Французите ги поддржуваат протестите. Според анкетата на Elabe спроведена за BFMTV, 56% од граѓаните го „поддржуваат“ или имаат „симпатии“ за денешниот штрајк. Сепак, оваа стапка на одобрување е малку помала во споредба со мобилизациите против пензиската реформа во 2023 година, кога поддршката беше помеѓу 60 и 63%.
Од друга страна, 25% од Французите не ја одобруваат мобилизацијата, 18% се рамнодушни, додека 1% немаат мислење.
Се чини дека неодамнешните промени во владата не го смирија општествениот гнев, бидејќи 66% од испитаниците веруваат дека политиките на новиот премиер Себастијан Лекорну ќе бидат само „во континуитет со оние на претходните влади на Емануел Макрон“.