Европската комисија (ЕК) вчера предложи измени во законот, со цел земјите-членки на Унијата да можат да ги депортираат мигрантите кои немаат право на азил во Европската Унија во трети земји со кои – немаат врска
Статусот на безбедна трета земја им овозможува на земјите-членки да одбијат барање за азил ако барателот може да добие ефикасна заштита во земја што се смета за безбедна.
Според сегашните правила, за да може да се примени овој концепт, потребно е да се докаже дека постои некаква врска помеѓу подносителот на барањето и безбедната трета земја, на пр. дека има роднини во таа земја или дека работел или студирал таму.
Извршната власт на ЕУ сега предлага воспоставувањето на таа врска да биде опционално, што би го забрзало враќањето на мигрантите.
Исто така, сугерира дека транзитот низ трета земја преку која мигрантот дошол во ЕУ може да се смета за доволна врска за примена на концептот на безбедна трета земја.
Според правото на ЕУ, третите земји можат да се сметаат за безбедни кога исполнуваат голем број услови, како што се заштита од присилно враќање на барателите на азил во земја каде што би можеле да бидат прогонувани и дека не постои реален ризик од сериозна штета и закани по животот и слободата врз основа на раса, религија, националност, членство во социјална група или политичко мислење.
Предлогот на ЕК беше остро критикуван од Амнести Интернешнл, невладина организација за заштита на човековите права, оценувајќи дека станува збор за „циничен обид“ за намалување на правата на барателите на азил.
„Дозволувањето на земјите-членки на ЕУ насилно да испраќаат баратели на азил во земји со кои немаат никаква врска, без можност за жалба, е циничен обид да се намалат правата на барателите на азил и да се избегне одговорноста за заштита на бегалците“, изјави Оливија Сандберг Диез, портпаролка на Амнести Интернешнл за миграција и азил.