Според последниот извештај на француското Министерство за внатрешни работи, низ целата земја се уапсени 140 лица, од кои 75 се приведени, вклучувајќи 16 во Париз.Повредени се и осум полицајци, објавува „Ле Паризиен“.
Студентскиот сојуз соопшти дека над 110.000 млади луѓе учествуваат во денешните штрајкови. Според „Ле Паризиен“, утринава биле блокирани 14 универзитети, а масовни собири на млади луѓе се забележани во сите градови со универзитети. „Вкупно, акции за мобилизација беа одржани во 60% од универзитетите“, истакнува студентскиот сојуз.
https://x.com/HeleneMacon/status/1968616568159658471
Националната полиција извести дека 264.000 луѓе протестираат низ Франција, надвор од Париз. Регистрирани се 427 инциденти, од кои 299 се во областа под надлежност на Националната полиција, а 94 блокади се во тек, вклучувајќи 76 во истата област. Според „Ле Фигаро“, покрај Париз, пријавени се 114 апсења низ земјата.
Француските власти проценуваат дека 10,95% од државните службеници учествуваат во штрајкот, според „Ле Фигаро“.
https://x.com/TribunePop23/status/1968593042622787619
Франција е зафатена од бран протести и штрајкови предизвикани од предлог-буџетот за 2026 година. Властите го оправдуваат буџетот како неопходен за справување со растечкиот јавен долг, но синдикатите и граѓаните го критикуваат како закана за социјалните права и го опишуваат како катастрофален.
Планот предвидува значителни кратења на јавните расходи, што може да влијае на здравството, образованието и транспортот. Дополнително, реформите во пензискиот систем и можноста за одложување на возраста за пензионирање предизвикаа силно незадоволство.
https://x.com/Theop_rn/status/1968613222442827886
Синдикатите бараат поголем даночен товар за богатите и големите корпорации, предупредувајќи на зголемената социјална нееднаквост и падот на куповната моќ. Според нив, предложениот буџет најмногу ги погодува граѓаните со ниски и средни примања.
Политичката ситуација е напната – новиот премиер Себастијан Лекорну се соочува со предизвици во услови на намален кредитен рејтинг од агенциите и притисок од Брисел за контрола на буџетскиот дефицит. Во овој контекст, синдикатите повикаа на масовни демонстрации, а проценките укажуваат дека на улиците би можеле да излезат до 900.000 луѓе.