Покрената е истрага против шпански турист откако објавил снимка од Кенија на која се гледа како му дава пиво на слон, предизвикувајќи бес на социјалните мрежи. Во видео снимено во резерват за диви животни, се гледа како туристот пие пиво од локален производител, а потоа го напои слонот.
„Пиво со пријател кој има кљови“, напишал тој во описот на една од снимките што ги објавил на Инстаграм.
Би-Би-Си ја анализираше автентичноста на видеото, кое е снимено во резерватот за дивеч Ол Џоги во централниот кениски округ Лаикипија. Персоналот на приватниот резерват беше шокиран од однесувањето на туристот.
- „Ова никогаш не требаше да се случи. Ние сме организација за заштита на природата и не можеме да дозволиме да се случи нешто вакво“, рече еден од вработените и додаде: „Не им дозволуваме на луѓето да се приближуваат до слоновите“.
Портпаролот на Службата за диви животни во Кенија, Пол Удото, потврди за Би-Би-Си дека нивната агенција исто така го истражува инцидентот.
Човекот во видеото, кој се претставува себеси на социјалните мрежи како Skydive_Kenya и тврди дека е „зависник од адреналин“, сподели друго видео во вторникот. Во него, тој им дава моркови на два слона, а потоа вели: „Време е за пиво“. Стотици коментари, вклучително и повици за депортација, доведоа до отстранување на тие објави.
Се верува дека слонот на кој му го дал пивото е Бупа, пријателски мажјак со карактеристично оштетен заб. Бупа бил спасен во 1989 година и однесен во резерватот Ол Џоги, познат по рехабилитација на животни.