„Нема да отстапиме ниту еден сантиметар, сè е напишано црно на бело“ – рече бугарскиот министер за надворешни работи Георг Георгиев, запрашан за европската интеграција на Македонија.
Тој учествуваше на парламентарната седница, каде што пратениците од сите бугарски партии усвоија Декларација во која се нагласува дека секој обид во рамките на ЕУ за повторно преговарање, заобиколување или игнорирање на елементи од веќе постигнатите договори е неприфатлив.
„Бугарија ќе продолжи да го почитува она што беше договорено во 2022 година. Нема да отстапиме ниту еден сантиметар од договорот. Нема да престанеме да повторуваме дека почитувањето на европските барања е нешто неопходно за да се постигне напредок“, рече Георг Георгиев, министер за надворешни работи на Бугарија.
Додека Георгиев вели дека бугарската позиција е стабилна и цврста, во Европскиот парламент се подготвува гласање за Извештајот за Македонија, во кој се споменува посебен македонски идентитет и јазик.
Известувачот на Европскиот парламент за Македонија, Томас Вајц, нагласи дека поради некои прашања што ги покрена, особено од бугарската страна, посебноста на македонскиот идентитет и јазик треба да се спомене во Извештајот што го подготвил. Дебатата за текстот ќе започне следната недела.