Владата на американскиот претседател Доналд Трамп има намера да прифати авион „Боинг 747-8“ како подарок од катарското кралско семејство, кој би послужил како претседателски авион „Ер Форс Уан“, дознава „Ројтерс“ .
Тој луксузен авион би бил еден од највредните подароци што владата на САД некогаш ги добила. Новиот комерцијален 747-8 чини приближно 400 милиони долари.
Трамп се чини дека е подготвен да го прифати подарокот од Катар.
Во неделата, тој на социјалните мрежи напиша:
„Значи, фактот дека Министерството за одбрана добива бесплатен авион 747 што привремено ќе го замени 40-годишниот Air Force One, во многу јавна и транспарентна трансакција, толку многу ги вознемирува корумпираните демократи што инсистираат ние да платиме, со највисока цена, за авионот. Демократите се губитници од светска класа!!!“.
Демократите и многу експерти велат дека е неетички и веројатно неуставно да се прифати таков подарок.
„Не е само поткуп, туку е и врвно странско влијание…“ напиша лидерот на демократите во Сенатот, Чак Шумер, на социјалните мрежи.
Каролин Ливит, портпаролка на Белата куќа, изјави дека секој подарок од странски влади секогаш е прифатен во целосна согласност со сите важечки закони и дека администрацијата на Трамп е посветена на целосна транспарентност.
Портпаролот на Катар, Али Ал-Ансари, сепак изјави дека евентуалното донирање на авионот сè уште се разгледува и дека не е донесена никаква одлука.
Трамп оваа недела патува на турнеја низ арапските земји, што ќе вклучува и посети на Катар.