Портпаролот на Кремљ, Дмитриј Песков, одговараше на забелешките од петокот на американскиот претседател Доналд Трамп, кој на средбата со унгарскиот премиер Виктор Орбан минатиот петок рече: „Мислам дека се согласуваме дека војната ќе заврши во не толку далечна иднина“.
Песков, на брифингот за новинарите, го повтори ставот на Кремљ дека војната би можела да заврши откако Русија ќе ги постигне своите цели и дека би претпочитала да го стори тоа со политички и дипломатски средства, јави Ројтерс
„Но, во моментов има пауза, ситуацијата е во застој. Таа е во застој без наша вина“, забележа тој, обвинувајќи ја Украина.
Украина и нејзините европски сојузници го отфрлаат обвинувањето на Москва дека ги блокира мировните напори.
Немало разговори лице в лице меѓу Русија и Украина од 23 јули.
Трамп се обиде да ги убеди рускиот претседател Владимир Путин и украинскиот претседател Володимир Зеленски да се сретнат, но Кремљ рече дека таков самит може да се одржи само во Москва – услов што Зеленски го отфрли. Тој постојано повторуваше дека не верува оти Путин е сериозен во барањето мир.
Песков рече дека Киев не сака да го продолжи разговорот.
„Тие се поттикнуваат на секој начин од Европејците, кои веруваат дека Украина може да ја добие војната и да ги обезбеди своите интереси со воени средства“, рече тој.
Тој рече дека ова е длабока заблуда, со оглед на ситуацијата на фронтот.
Како што војната се приближува кон четвртата година, Русија држи околу 19% од украинската територија и силно се залага за освојување на градовите Покровск и Купјанск.