Лидерката на парламентарната група на десничарската партија Национален собир (РН), Марин Ле Пен, синоќа , во интервју за францускиот телевизиски канал TF1, го повика новоназначениот премиер Себастијан Лекорни да се откаже од политиките на „макронизмот“, тврдејќи дека актуелниот режим не ги задоволува потребите на францускиот народ.
– Го молам Себастијан Лекорни да престане со макронизмот… Не можеме бесконечно да владееме без народот или против него, изјави Ле Пен.
Таа го критикуваше претседателот Емануел Макрон, истакнувајќи дека тој има две опции за излез од тековната политичка криза: да го распушти парламентот или да поднесе оставка, во согласност со уставните можности на Петтата Република.
– Тоа значи враќање кај народот. Тоа е духот на Петтата Република. Не барам негова оставка. Само велам дека тој има два начина да излезе од кризата: или да го распушти Националното собрание или да поднесе оставка, рече таа.
Ле Пен ги отфрли обвинувањата дека нејзината партија предизвикува политичка нестабилност, тврдејќи дека Французите се уморни од „наметнатата стабилност“ што не ги одразува нивните желби.
– Французите сакаат правда и ефикасност. Не е нестабилноста она што ги загрижува Французите. Она што ги загрижува е стабилноста на политиките што повеќе не ги сакаат, а кои им се наметнати, додаде таа.
Овие изјави доаѓаат во услови на длабока политичка криза во Франција, по соборувањето на поранешниот премиер Франсоа Бајру на 8 септември поради контроверзните буџетски кратења и назначувањето на Лекорни за нов премиер на 9 септември, што дополнително ги разгоре протестите и незадоволството меѓу граѓаните.