Цената на горивата нема да отиде над 100 денари, дизелот останува ист, бензинот поевтин за два денари по литар. И покрај нагорните трендови на светските берзи, македонските граѓани ќе продолжат да плаќа најевтини горива во регионот. Владата и официјално ги намали акцизите, 4 денари за нафтата и 2 денари за бензините. На сила уште најмалку две недели останува и мерката за понизок данок од 18 на 10 проценти.
-Доколку не се случеше ова намалување на акцизата тогаш литар дизел ќе беше отприлика 102 денари, можеби и над 102 денари, така велат нашите калкулации, бидејќи берзата се затвори во четврток, поради велигденските празници и ќе се рестартира во вторник. А безоловниот 95 и 98 октански, ќе беше поголем за 1 и пол до два денари, изјави премиерот Христијан Мицкоски.
Покрај пониските акцизи, на сила до крај на април останува и попустот на ОКТА. Мицкоски кажа дека имале разговори, со цел граѓаните да плаќаат уште поевтини горива.
-Доаѓаме до цена која што за дизелот ќе биде иста како и до сега, практично доколку се вкалкулира попустот за четири денари од акцизата и три денари кој што го добиваме од ОКТА, така што оние седум денари потенцијално зголемување ги амортизираме. Додека пак кај безоловниот 95 и 98 октански, покрај оние два денари по литар, ќе имаме дополнителни два денари по литар намалување, изјави Мицкоски.
На македонските бензиски последниве недели покрај нашите граѓани, горива полнат и од соседните држави. На дневно ниво, ако претходно потрошувачката била еден милион тони, сега во просек е по 2 милиони. Според премиерот, потреба од некакви рестриктивни мерки не е потребна, бидејќи Македонија сега е фактор на енергетска стабилност во регионот. Покрај за потрошувачката на мало, од државава со керозин се снабдуваат и неколку аеродроми во регионот.
-Треба да се навикнеме и во состојба кога не коленичиме, туку кога емитуваме стабилност и сигурност, ние во моментов како држава сме фактор на стабилност во регинот. И ние како држава сметаме дека тоа што го овозможуваме да граѓани од соседните држави ги користат нашите ресурси, напротив помагаме во македонската економија, а не имаме одземена вредност, туку имаме додадена вредност. Но, еве и на граѓаните од другите држави им овозможуваме да користат поевтини енергенси, ијзави Мицкоски.
Иако состојбата во целиот свет од ден во ден станува се понеизвесна, а оваа криза се очекува да трае на подолг рок, премиерот уверува дека економската состојба во државата е стабилна. Според проекциите од првиот квартал годинава, каде приходите во буџетот биле согласно очеквуањата, нови задолжувања во моментов не се потребни, ниту планирани.