Само еден од четири Американци ја одобрува воената кампања на САД против Иран, покажа анкета на Ројтерс/Ипсос објавена денеска.
Масовните американско-израелски напади врз Иран започнаа во саботата, при што беа убиени врховниот лидер на Иран, ајатолахот Али Хамнеи, и други високи функционери, заедно со стотици цивили. Техеран одговори со воздушни напади врз Израел и неколку земји од Персискиот Залив кои се домаќини на американски воени бази.
Анкетата за време на викендот, спроведена на околу 1.300 возрасни Американци, покажа дека само околу 27 проценти ги одобруваат нападите, 43 отсто не ги одобруваат, а 29 отсто не се сигурни. Покрај тоа, 56 проценти од Американците – вклучувајќи еден од четворица републиканци – рекоа дека американскиот претседател Доналд Трамп, кој нареди напади во Венецуела, Сирија и Нигерија во последните месеци, е „премногу подготвен да употреби воена сила“ под изговор за унапредување на американските интереси.
Додека 55 отсто од републиканците ги одобруваат нападите, 42 отсто рекоа дека би било помалку веројатно да ја поддржат кампањата во Иран ако американските војници бидат убиени или повредени. Анкетата беше затворена пред Пентагон да потврди доцна во неделата дека тројца американски војници се убиени, а неколкумина се ранети.
Стравувањата за цените на горивата, исто така, влијаеја на ставот: 45 проценти рекоа дека би било помалку веројатно да ја поддржат кампањата доколку цените на бензинот или нафтата се зголемат. Глобалните цени на нафтата скокнаа до 13 отсто денеска поради загриженоста за сообраќајот на танкери низ Ормуцкиот теснец, тесниот воден пат помеѓу Иран и Оман, преку кој се пренесува околу 20 отсто од глобалните залихи на нафта и гас.