Рускиот претседател Владимир Путин денеска изјави дека е отворен за можноста за средба со украинскиот претседател Володимир Зеленски и предложи таа да се одржи во Москва.
„Ако Зеленски е подготвен за состанок, нека дојде во Москва“, рече Путин, додавајќи дека „има светлина на крајот од тунелот“, објави „РИА Новости“.
Тој истакна дека доколку преовладее разумот, може да се постигне договор за завршување на војната во Украина на начин што би бил прифатлив за сите страни.
„Во спротивно, ќе мораме сè да решиме воено“, рече Путин, додавајќи дека го информирал американскиот претседател Доналд Трамп за неговата намера да се сретне со Зеленски.
Путин нагласи дека е можно да се најде прифатливо решение за ставање крај на конфликтот, истакнувајќи дека сите досегашни обиди на Русија за мирно решавање на украинското прашање биле попречувани.
Тој ја пофали искрената желба на администрацијата на Трамп да го реши конфликтот во Украина и го нарече Зеленски „вршител на должноста шеф на администрацијата на Украина“.
Коментирајќи ја својата неодамнешна посета на Кина, каде присуствуваше на воена парада по повод Денот на победата во Втората светска војна, Путин рече дека посетата била исклучително успешна и истакна дека Кина продолжува да биде клучен двигател на глобалната економија.
„Во овој поглед, особено би ја истакнал кинеската иницијатива за глобално управување. Ми се чини дека ова е многу навремено и, што е важно, оваа иницијатива е насочена кон позитивна соработка меѓу оние земји што се собраа на самитот во Кина и нашите потенцијални партнери меѓу земјите што во моментов не сакаат да го прогласат ова партнерство“, рече Путин, додавајќи дека побарувачката за енергетски ресурси расте, особено во кинеската економија.
Говорејќи за концептот на мултиполарност, Путин појасни дека тоа не подразбира појава на нови хегемони, туку дека сите земји треба да имаат еднакви права, пренесува „Танјуг“.