Привремената претседателка на Венецуела, Делси Родригез, неодамна изјави дека е „презаситена“ од наредбите што доаѓаат од Вашингтон, додека таа се труди да ја обедини земјата по апсењето на поранешниот лидер Николас Мадуро од страна на Соединетите Американски Држави.
Родригез се наоѓа во исклучително тежок и деликатен положба откако САД ја поддржаа како привремен лидер. Таа мора да балансира меѓу задржувањето на лојалноста кај поддржувачите на Мадуро и исполнувањето на очекувањата од Белата куќа, како што пренесува CNN.
Не поминал ниту еден месец откако ја презеде оваа улога, а Родригез веќе почна отворено да им се спротивставува на притисоците од Америка. Особено се спротивстави на барањата Венецуела да го зголеми производството на нафта.
„Доста со наредбите на Вашингтон врз политичарите во Венецуела“, рече таа пред група нафтени работници во градот Пуерто Ла Круз, на настан што го пренесуваше државната телевизија.
„Нека венецуелската политика ги реши нашите разлики и нашите внатрешни конфликти. Оваа Република плати многу висока цена за соочување со последиците од фашизмот и екстремизмот во нашата земја.“
Белата куќа продолжува со постојан притисок врз Венецуела откако на почетокот на јануари американски сили извршија рација и го уапсија Мадуро заедно со неговата сопруга Силија Флорес, кои потоа беа одведени во Соединетите Држави.
Родригез, која претходно беше заменик на Мадуро, во последните недели постојано нагласува дека САД не можат да управуваат со Венецуела, иако засега избегнува директна и отворена конфронтација со Вашингтон.
Американскиот претседател Доналд Трамп веднаш по апсењето изјави дека САД ќе ја „водат“ Венецуела, но подоцна ја поддржа Родригез како привремена претседателка.
Само денови по акциите во Каракас, администрацијата на Трамп постави низа услови пред Венецуела. Според двајца високи функционери на Белата куќа, тие барања вклучуваат прекин на врските со Кина, Иран, Русија и Куба, како и договор за ексклузивно партнерство со САД во областа на нафтата.
Се очекуваше Родригез да им даде предност на американските нафтени компании при идните продажби на нафта. Нафтата останува главниот столб на венецуелската економија, а земјата поседува најголемите резерви на екстра-тешка сурова нафта во светот — вид нафта што бара посложен и поскап процес на рафинирање, но е добро компатибилна со американските рафинерии.