Претседателот на САД, Доналд Трамп, денеска ќе им го претстави на арапските и муслиманските лидери предлогот за мир и поствоена управа во Газа, пренесува Аксиос, повикувајќи се на американски и арапски претставници.
На состанокот во Њујорк, на маргините на Генералното собрание на ОН, ќе учествуваат претставници на Саудиска Арабија, Обединетите Арапски Емирати, Катар, Египет, Јордан, Турција, Индонезија и Пакистан.
Покрај ослободувањето на заложниците и крајот на конфликтот, Трамп ќе разговара за принципите на израелско повлекување од Газа и поствоена управа без учество на Хамас, со акцент на регионална стабилизација.
САД бараат арапските и муслиманските земји да испратат воени сили за да овозможат израелско повлекување, како и да обезбедат финансиска поддршка за транзицијата и обновата на Газа.
Ова е најконкретниот предлог од Трамп досега, но арапските лидери очекуваат гаранции за спречување на анексија на Западниот брег и крај на војната, додека Израел веќе сигнализира дека некои елементи може да не му се допаднат, особено улогата на Палестина.