Претседателот на САД Доналд Трамп најави дека „многу скоро“ ќе почнат операции „по копно“ за спречување на венецуелски шверцери со дрога.
Во онлајн разговор со припадници на американските вооружени сили, Трамп истакна дека веќе нема многу венецуелски шверцери на дрога што доаѓаат по морски пат, како и дека неговата администрација речиси го запрела влегувањето на дрога во САД преку море.
– Околу 85 отсто е запрено по море. Веројатно забележавте дека луѓето не сакаат да доставуваат по морски пат. И ние ќе почнеме да ги спречуваме и по копно. Копното е полесно и тоа ќе почне многу скоро. Ги предупредуваме, престанете да испраќате отров во нашата земја – порача американскиот претседател.
Коментарите на Трамп сугерираат дека тој ја донел одлуката да преземе понатамошни чекори во Венецуела по серија состаноци на високо ниво и демонстрација на американската воена моќ во регионот претходно овој месец. Претходно оваа недела Трамп ги прогласи венецуелскиот претседател Николас Мадуро и неговите владини сојузници за членови на странска терористичка организација. Означувањето на таканаречениот „Картел на Сонцето“ како странска терористичка организација му дава на Трамп овластување да воведе нови санкции насочени кон средствата и инфраструктурата на Мадуро.
Како дел од операцијата, која Пентагон ја нарече „Операција јужно копје“, американската војска распореди повеќе од 10 воени бродови и 15.000 војници во регионот. Меѓу бродовите и „УСС Џералд Форд“, најголемиот носач на авиони некогаш изграден.
Администрацијата на Трамп и претходно најави дека размислува за засилена акција против копнените операции на трговците со дрога, како дополнување на воените напади врз бродовите во Карипско Море што се осомничени за превоз на дрога.
Според американските податоци, во изминатите недели американската војска постојано пукала врз пловила на осомничени шверцери со дрога во Карибите, при што загинале повеќе од 80 лица.
Администрацијата на Трамп ги прогласи нарко-картелите за терористички организации. Венецуела, пак, го обвинува Вашингтон дека сака да предизвика промена на режимот во земјата.