Претседателот на Соединетите Американски Држави, Доналд Трамп, изјави дека верува оти е близу до постигнување договор за крај на војната во Газа, пренесува Ројтерс. Како што им изјави на новинарите на излегување од Белата куќа, договорот за враќање на израелските заложници е близу.
- Изгледа дека имаме договор за Газа. Мислам дека тоа е договор кој ќе ги врати заложниците дома и ќе стави крај на војната, изјави Трамп, без да открие повеќе детали.
САД претходно претставија мировен план со 21 точка за Блискиот Исток, чија цел е да се стави крај на речиси двегодишниот конфликт меѓу Израел и Хамас. Планот беше објавен во време на општополитичките дебати на 80. сесија на Генералното собрание на ОН во Њујорк, на кои учествуваа светските лидери.
Предлогот во вторник бил доставен до Саудиска Арабија, ОАЕ, Катар, Египет, Јордан, Турција, Индонезија и Пакистан, соопшти специјалниот пратеник на Трамп, Стив Виткоф.
Трамп, кој останува најцврст сојузник на Израел на меѓународната сцена, денеска изјави дека разговарал со претставници на блискоисточните земји, како и со израелскиот премиер Бенјамин Нетанјаху.