Американскиот претседател Доналд Трамп го обвини кинескиот лидер Си Џинпинг дека заговорнички делува против САД заедно со рускиот лидер Владимир Путин и севернокорејскиот лидер Ким Џонг Ун.
Изјавата на Трамп дојде додека Кина беше домаќин на најголемата воена парада по повод Денот на победата, на која присуствуваа 26 шефови на држави, вклучувајќи ги Путин и Ким.
„Пренесете ги моите најтопли поздрави на Владимир Путин и Ким Џонг-ун додека заговорнички делувате против Соединетите Американски Држави“, напиша Трамп на својата мрежа „Трут соушал“.
Кина се обидува да се позиционира како противтежа на САД по царините на Трамп, кои го нарушија глобалниот економски и политички поредок.
Иако некои го толкуваат присуството на Путин и Ким како порака до Западот, кој ги изолираше, Трамп изјави дека не ја гледа парадата како предизвик за САД.
На прашањето од Би-Би-Си дали Пекинг и неговите сојузници формираат коалиција против САД, Трамп рече: „Не. Воопшто не. На Кина ѝ требаме“.
Трамп нагласи дека има „многу добри односи“ со Си и истакна дека е уверен во американската воена надмоќ. – Америка има најмоќни вооружени сили во светот, и тие никогаш не би се осмелиле да ги употребат против нас. Тоа би било најлошата работа што би можеле да ја направат, рече тој во радио интервју.
Во истото интервју, Трамп изјави дека е „многу разочаран“ од Путин поради неуспехот да постигнат мировен договор за Украина за време на нивната средба во Алјаска минатиот месец. – Ќе преземеме нешто за да им помогнеме на луѓето да живеат во Украина, најави тој, без детали.
Кина, иако не ја осуди руската инвазија, е обвинувана од Западот дека ѝ помага на Москва преку набавка на нафта и испорака на материјали со двојна намена. Пекинг ги отфрла овие обвинувања.
Јапонија одби да ја коментира парадата, наведувајќи дека со Кина гради „конструктивни односи“.