Американскиот претседател Доналд Трамп ја опиша воената операција што Соединетите Американски Држави ја спроведоа во главниот град на Венецуела како „извонредна“, истакнувајќи дека акцијата била извршена по негова директна наредба и траела во текот на ноќта и утринските часови.
Во своето обраќање, Трамп нагласи дека американската воена моќ била „преовладувачка“, со истовремено дејство од воздух, копно и море. Според него, оваа операција демонстрира целосна воена супериорност и одлучност на САД.
Трамп го нарече Николас Мадуро „диктатор“, директно обвинувајќи го дека бил дел од нарко-мафија, при што поради неговите активности умреле илјадници луѓе од дрога што се дистрибуирала по улиците. Тој соопшти дека Мадуро е пренесен во Њујорк, каде што ќе се одлучи за неговата иднина.
„Ние ќе ја водиме земјата некое време додека не дојде до правилна транзиција на власта. Ние носиме мир, слобода и правда во Венецуела“, изјави Трамп, без да прецизира колку долго би траела евентуалната американска контрола и под каков мандат.
Тој потоа додаде „Подготвени сме за втора фаза ако е потребно“. Трамп им честиташе на сите учесници во воената операција во Венецуела.
Оваа изјава доаѓа по серијата експлозии во Каракас и објавата на Трамп за заробувањето на Мадуро, што предизвика меѓународни реакции и зголемени тензии во регионот.
Целото вонредно обраќање на Доналд Трамп погледнете го подоле