„Што се однесува до трасата – ако не биде таа, ќе најдеме друго решение кое нема да ги прекрши препораките што постојано ги спомнувам. За ова не сум толку загрижен, бидејќи имаме решение. Поголем проблем е иднината на семејствата кои не можат да се развиваат. Имаме случаи кога дете сака да се осамостои и да направи надградба на семејната куќа, но не може поради ограничувањата од УНЕСКО“, рече Мицкоски.
Најатрактивната туристичка зона во Македонија, Охрид и Струга, треба да најде начин за развој, слично како и други светски градови под заштита на УНЕСКО, рече Мицкоски, споменувајќи го Котор во Црна Гора. Во меѓувреме, и другите делници од автопатот што водат од главниот град кон Охрид се во тек на реализација. „Заемот што требаше да го земеме од кинеската банка ‘Ексим’ повеќе не го земаме – тоа е прекинато. Но брзо се реорганизиравме и тој проблем е надминат. Формиран е конзорциум од домашни банки, со поповолни услови, и практично тие ќе го обезбедат финансирањето, по што тој сегмент ќе биде целосно функционален.“, изјави Мицкоски.
Работите продолжуваат и на делниците Тетово–Гостивар и Гостивар–Букојчани. За делницата Букојчани–Кичево е доставен извештај до кредиторите и се очекува понуда за продолжување со тендерската постапка и градежните активности на терен, со што ќе се заокружи трасата на Коридорот 8 до Охрид.