Венецуелскиот претседател Николас Мадуро пристигна во притвор во Њујорк по молневитата американска воена операција за негово заробување во Каракас вчера.
Американскиот претседател Доналд Трамп соопшти дека САД привремено ќе ја водат Венецуела и ќе ги преземат нејзините огромни нафтени резерви.
По акцијата, во која беше исклучена струјата во делови од Каракас и беа нападнати воени објекти, Мадуро и неговата сопруга Цилија Флорес беа префрлени со воен брод и авион во Соединетите Американски Држави. Авионот слета во близина на Њујорк во саботата навечер, по што Мадуро беше пренесен со хеликоптер до градот и одведен со голем конвој во притвор во Бруклин под строго полициско обезбедување.
Мадуро утре треба да се појави пред судот во Менхетн, каде што ќе се соочи со федерални обвиненија, меѓу кои и заговор за нарко-тероризам.
„Ќе ја водиме земјата сè додека не направиме безбедна, правилна и разумна транзиција. Ако биде потребно, САД ќе изведат втор, многу поголем напад врз Венецуела.
Венецуелскиот народ е повторно слободен, а Америка е побезбедна и погорда нација денес“, изјави Трамп на прес-конференцијата во Флорида.
Во Каракас, Врховниот суд ја прогласи потпретседателката Делси Родригез за привремена претседателка на Венецуела.
Некои правни експерти ја доведоа во прашање легалноста на операцијата, додека демократите во Конгресот, кои тврдат дека биле заведени на неодамнешните брифинзи, побараа јасен план за наредните чекори.
Трамп најави дека големите американски нафтени компании ќе се вратат во Венецуела – земја со најголеми резерви на нафта во светот – и ќе ја обноват деградираната инфраструктура, процес што според експертите може да трае со години. Тој остави отворена можноста за испраќање американски копнени сили.
Акцијата се подготвувала со месеци, со помош на извор од ЦИА во венецуелската влада. Трамп истакна дека во операцијата не загинал ниеден американски војник и не било изгубено парче опрема.
View this post on Instagram