Американскиот претседател Доналд Трамп изјави дека израелскиот премиер Бенјамин Нетанјаху е „воен херој затоа што работевме заедно“, мислејќи притоа на израелските напади врз Иран минатиот месец..
„Тој е воен херој. Претпоставувам дека и јас сум“, рече Трамп.
„Никому не му е гајле. Но, и јас сум. Мислам, јас ги испратив тие авиони“, рече Трамп во гостување во радио емисија, пренесе Политико
Инаку, Нетанјаху е предмет на потерница од Меѓународниот кривичен суд од минатиот ноември за наводни воени злосторства во Газа.
Повеќе од 60.000 Палестинци се убиени во опколената крајбрежна енклава за време на офанзивата на израелската војска, која започна по нападот на Хамас врз Израел на 7 октомври 2023 година, во кој загинаа околу 1.200 луѓе.
Трамп никогаш не се борел во вистинска војна, ниту служел во војска.
Тој доби пет одложувања од регрутацијата во Виетнамската војна, вклучително и медицинско ослободување по дијагноза на коскени израстоци на неговите петици кога имал 22 години.
Во 2015 година, Трамп се најде на насловните страници кога тврдеше дека републиканскиот сенатор од Аризона, Џон Мекејн, кој поминал повеќе од пет години како воен заробеник во Северен Виетнам, „не е воен херој“ затоа што, како што изјави, „ги сакам луѓето кои не биле заробени“.
Во 2020 година, Атлантик објави дека Трамп приватно ги омаловажувал мртвите војници, нарекувајќи ги „губитници“ и „наивци“, обвинувања што тој енергично ги негираше, потсетува Политико.