Германскиот канцелар Фридрих Мерц изјави дека директни преговори меѓу Владимир Путин и Володимир Зеленски се малку веројатни, и покрај упорните напори на администрацијата на Доналд Трамп да постигне мировен договор за Украина.
„Независно од разговорите меѓу Трамп и Путин, за време на нашиот состанок во Вашингтон беше јасно дека средба меѓу Путин и Зеленски нема да се случи“, изјави Мерц пред вечерата со францускиот претседател Емануел Макрон во неговата летна резиденција.
По состанокот со европските лидери во Белата куќа минатата недела, Трамп тврдеше дека е договорена средба меѓу Путин и Зеленски, но Москва набрзо ги намали очекувањата, истакнувајќи дека такво нешто не е на повидок во блиска иднина.
Дел од европските лидери приватно изразуваат сомнежи дека мировните иницијативи на Трамп ќе вродат со плод, но изјавата на Мерц претставува еден од најострите јавни изрази на недоверба кон овие напори. Тој се обрати по последниот руски воздушен напад врз Киев, во кој вчера загинаа најмалку 23 лица, меѓу кои и четири деца.