Генерал-полковник Валериј Герасимов, командант на руската армија, објави дека инвазијата во Украина ќе продолжи со нови цели за есенската офанзива, и покрај зголемените апели од Западот за започнување преговори.
–Во моментов, нападите се во тек на целата линија на фронтот. Денеска ги дефинираме задачите на поединечните групи на вооружените сили за есенскиот период – изјави Герасимов.
Тој тврди дека руските сили моментално контролираат 99,7% од Луганската област, 79% од Доњецк, 76% од Херсон и 74% од Запорожје. Како услов за прекин на огнот, Москва бара целосно повлекување на украинските сили од Доњецк.
Украинскиот претседател Володимир Зеленски ги отфрли овие барања, нагласувајќи дека Украина нема да ги предаде Славјанск и Краматорск, кои се клучни одbranбени центри на истокот.
Од друга страна, рускиот преговарач Кирил Дмитриев ги обвини западните сојузници на Киев дека со „нереални барања“ го продолжуваат конфликтот. – ЕУ мора да престане да го попречува мировниот процес – рече Дмитриев.
Москва досега ја отфрла можноста за распоредување европски војници во Украина за надзор на потенцијален мировен договор, додека европските лидери тврдат дека Кремљ само добива време за подготовка на нови напади.