Американскиот претседател Доналд Трамп синоќа соопшти дека ќе му го додели Претседателскиот медал на слободата, највисокото цивилно признание во САД, на поранешниот градоначалник на Њујорк, Руди Џулијани. Оваа одлука доаѓа два дена по хоспитализацијата на Џулијани поради сообраќајна несреќа во Њу Хемпшир.
Претседателскиот медал на слободата се доделува на лица кои дале исклучителен придонес за напредокот, вредностите или безбедноста на САД, за светскиот мир или за значајни општествени и јавни заложби.
„Како Претседател на Соединетите Американски Држави, со задоволство објавувам дека Руди Џулијани, најголемиот градоначалник во историјата на Њујорк и подеднакво голем американски патриот, ќе го добие ПРЕТСЕДАТЕЛСКИОТ МЕДАЛ НА СЛОБОДАТА, нашето највисоко цивилно признание. Детали за времето и местото ќе следат. Ви благодарам за вниманието кон ова прашање. ПРАВЕТЕ ЈА АМЕРИКА ПОВТОРНО ВЕЛИКА!!!“ напиша Трамп на Трут Соушл.
Џулијани беше градоначалник на Њујорк од 1994 до 2001 година и стекна национална почит како „Сеамерикански градоначалник“ за неговото лидерство по терористичките напади на 11 септември 2001 година.
Во последните години, Џулијани беше адвокат на Трамп и активно ја поддржуваше неговата кампања за оспорување на резултатите од изборите во 2020 година. Во 2023 година, тој призна дека дал клеветнички изјави за двајца изборни работници од Џорџија, лажно обвинувајќи ги за обид да го „украдат“ изборниот резултат во корист на Џо Бајден. Во јануари 2025 година, федерален судија го прогласи за виновен за непочитување на судот поради неподнесување информации за својата имотна состојба, што би можеле да се искористат за исплата на пресудата за клевета.
На 30 август 2025 година, автомобилот во кој патувал Џулијани бил удрен одзади со голема брзина на автопат во Њу Хемпшир. Тој се здобил со полесни повреди, вклучувајќи фрактура на ‘рбетот, и бил хоспитализиран. Неговиот портпарол, Мајкл Рагуса, изјави на социјалните мрежи дека Џулијани „се чувствува добро и одлично се опоравува“, додавајќи дека несреќата „не била насочен напад“.