Денес попладнето во Битола, по пауза од 31 година, повторно ќе се одигра меѓународен фудбалски натпревар, на кој ќе настапат младинските репрезентации на Македонија и Италија.
Општина Битола и Фудбалската федерација на Македонија во зададените рокови го реновираа стадионот „Петар Милошевски“ за играње меѓународен натпревар од високо ниво. Потврда за тоа добија од специјална инспекција на УЕФА, која додели лиценца за фудбалски натпревари на клупско и репрезентативно ниво.
Средбата меѓу репрезентациите на Македонија и Италија на возраст до 21 година е закажана за 18:15 часот. Најголем дел од влезниците се продадени. На публиката ќе ѝ биде овозможено следење на натпреварот од целосно обновени трибини, За новинарите е подготвен посебен медиумски центар. Вложувањата и интервенциите во стадионот претставуваат значаен чекор за развојот на фудбалската игра во градот и регионот, посочија од Општина Битола во пресрет на попладневниот натпревар, за кој обезбедено е осветлување.