Државата Македонија е мета на хибриден напад, затоа што за многу кратко време се случија тешки пожари кои предизвикуваат големо загадување на возодухот, предупредува директорот на Дирекцијата за заштита и спасување Стојанче Ангелов.
По пожарот во Центарот за рециклажа во скопското село Трубарево Ангелов се сомнева дека Македонија е цел на опасен координиран напад.
Во пожарот кој почна денеска околу пред 14 часот гори отпадна електрична и електронска опрема и батерии и акумулатори, литиум-јонски батерии од апарати и возила, како и друг електронски отпад.
„Според мене се работи за намерно подметнат пожар, не е едноставно да се запали ваков објект. За кратко време имаше пожари на депониите ‘Вардариште’, ‘Дрисла’ и вчера во Шуто Оризари, и денес оваа фабрика. За мотивите, како и за откривање на сторителите работат МВР и останатите служби. Апелирам до сите граѓани на 112 или на кој било друг начин да го пријават секое сомнително поведение“, вели Ангелов кој информира дека за среќа во пожарот нема повредени лица.