Британската тајна разузнавачка служба МИ6 ќе ја користи „темната мрежа“ (dark-web) за регрутирање информатори и собирање тајни информации од агенти во Русија и ширум светот, соопшти британското Министерство за надворешни работи. МИ6 ќе го користи порталот „темна мрежа“ наречен Silent Courier, кој овозможува безбедно доставување информации за нелегални активности или нудење услуги.
-Денес ги молиме оние со чувствителни информации за глобалната нестабилност, меѓународниот тероризам или активностите на непријателските државни разузнавачки служби безбедно да го контактираат МИ6 преку интернет, ќе изјави шефот на МИ6, Ричард Мур, во говор во Истанбул, каде денеска официјално ќе ги објави плановите.
-Нашите виртуелни врати се отворени за вас, рече Мур, кој претходно ги повика Русите да шпионираат за Велика Британија.
Промотивното видео истакнува дека, иако МИ6 традиционално се потпирала на лични средби, сега се свртува кон анонимноста на „темната мрежа“, која често ја користат дилери на дрога, терористи и сексуални злоупотребувачи на деца. Упатствата за користење на порталот ќе бидат објавени на Јутјуб каналот на МИ6 денеска во 7 часот наутро по британско време.
-Како што светот се менува и заканите со кои се соочуваме се зголемуваат, мора да се осигураме дека Велика Британија е секогаш еден чекор пред нашите противници. Сега ги зајакнуваме нивните напори со најсовремена технологија за да може МИ6 да регрутира нови шпиони во Русија и низ целиот свет, изјави министерката за надворешни работи Ивет Копер.
Оваа информација доаѓа во момент кога Ричард Мур, кој беше споменуван како можен кандидат за амбасадор на Велика Британија во Вашингтон, се подготвува да се повлече од функцијата шеф на МИ6 по пет години. Тој ќе биде заменет од Блејз Метревели, првата жена шеф на агенцијата.
Што е „Темната мрежа“ ?
„Темната мрежа“ (dark web) е дел од интернетот што не е индексиран од конвенционалните пребарувачи како Google или Bing и не е достапен преку стандардни веб-прелистувачи. За пристап до неа се користат специјализирани софтвери, како Tor (The Onion Router) или I2P, кои овозможуваат анонимно поврзување преку шифрирање на податоците и пренасочување на сообраќајот низ повеќе јазли (nodes) за да се прикрие идентитетот на корисникот.
Темната мрежа функционира на мрежи со висок степен на криптирање, каде што веб-локациите често имаат адреси со наставка „.onion“. Овие сајтови нудат анонимност и за корисниците и за операторите, што ја прави популарна за различни активности: од легални, како заштита на приватноста или слободно изразување во режими со цензура, до нелегални, како трговија со дрога, оружје, украдени податоци или хакерски услуги. Поради анонимноста, таа е привлечна и за криминални активности, но и за разузнавачки агенции или whistleblowers кои сакаат безбедно да споделат чувствителни информации.