Руската Федерална служба за безбедност (ФСБ) објави дека уапсила 45-годишна Русинка на Крим, главен готвач во ресторан во Севастопол, под сомнение дека шпионирала за Украина и планирала да труе руски војници, објави „Киев пост“.
Неименуваната жена, која е во притвор, е обвинета дека работела за Главната дирекција за разузнавање на Украина (ХУР) во последните две години. ФСБ тврди дека ги понудила своите услуги на украинската разузнавачка служба уште во септември 2023 година.
Според обвинувањата, таа користела WhatsApp за да споделува информации со своите врски за локациите и рутите на рускиот воен персонал и опрема во Севастопол – поранешното главно пристаниште на руската Црноморска флота.
ФСБ конкретно тврди дека фотографирала бродови на Црноморската флота стационирани во Севастополскиот залив, кои подоцна биле користени од украинските вооружени сили за планирање ракетни напади.
Таа е обвинета и за планирање труење на припадници на руските специјални сили кои го посетувале ресторанот каде што работела.
Одделот на ФСБ на Крим објави дека жената е обвинета за „велепредавство“ според член 275 од Рускиот кривичен законик, додавајќи дека е во тек истрага за нејзините „криминални активности“.
Во соопштението на ФСБ се вели дека ова е уште еден пример за тоа како „украинските специјални служби ја дестабилизираат социо-политичката ситуација и предизвикуваат економска штета на државата со активно регрутирање сторители на саботажи и терористички напади“.