Свеченото отворање на новата амбасада на Македонија во Вилнус утре ќе биде централен настан во рамките на работната посета на Литванија од македонскиот министер за надворешни работи и надворешна трговија, Тимчо Муцунски.
Амбасадата претставува значаен чекор кон натамошно зајакнување на дипломатското присуство на државата и продлабочување на билатералните односи и соработката со Литванија и поширокиот Балтички регион, соопшти МНР.
За време на престојот во Вилнус шефот на македонската дипломатија ќе оствари билатерална средба со својот литвански колега Кештудис Будрис, кој во јуни годинава ја посети Македонија. Во фокусот на разговорите ќе бидат натамошното унапредување на политичкиот дијалог, интензивирањето на економската соработка и евроинтегративните процеси.
Двајцата министри ќе разменат мислења и за актуелните безбедносни предизвици, како и за соработката во рамките на евроатлантското сојузништво.
Посетата на Муцунски на Вилнус се реализира во пресрет на претседавањето на Литванија со Советот на Европската Унија во првата половина на 2027 година.