Партијата „Вреди“ (Влен) денеска остро ги критикуваше измените на Кривичниот законик донесени со европско знаменце во претходниот собраниски мандат, обвинувајќи дека биномот ДУИ–СДСМ го злоупотребувал европскиот процес за да ги заштити Никола Груевски, Сашо Мијалков и нивните блиски соработници.
„Под маската на хармонизација со ЕУ, тие гласаа за измени кои денес предизвикуваат огромна штета на целото општество. Ова не беше закон за европски стандарди, туку амнестија за заробената држава, потпишана од ДУИ во име на Албанците, но во интерес на Груевски, Мијалков и криминалните клики што ги ограбија и Албанците и Македонците“, се наведува во соопштението на партијата.
Од „Вреди“ порачуваат дека на државата ѝ е потребна вистинска правда, а не закони скроени според потребите на политичарите кои се плашат од одговорност.
Партијата најавува дека ќе инсистира на целосно нов Кривичен законик, изработен со длабинска анализа, професионална експертиза и вистинско усогласување со европските стандарди.
„Нашиот став е јасен: ни е потребен современ кривичен систем што гарантира еднаквост пред законот и ефикасно казнување на корупцијата и злоупотребата на власта. ВЛЕН прв побара уставен амандман за зголемена одговорност за висока корупција. Нашиот приоритет е правен систем што ги штити граѓаните и правдата, а не оние што со децении ги чистеа своите скандали преку законот“, стои во реакцијата на партијата.