„Политичарот по име Адолф Хитлер е на прагот на уште една убедлива победа на локалните избори во Намибија. Локалниот советник, кој стана светски познат поради своето име уште во 2020 година, треба да обезбеди нов петгодишен мандат. Според изборната комисија, се очекува Хитлер да го задржи своето место со огромно мнозинство на изборите на 26 ноември.“ – објави хрватскиот информативен портал „Индекс.хр.“ во својата статија со наслов „Адолф Хитлер пред убедлива победа во Намибија“.
Порталот натаму пишува: На последните избори, тој ја освои изборната единица Омпунџа со 85 проценти од гласовите, обезбедувајќи 1.196 гласови наспроти 213, што ги доби неговиот противник. Целосното име на 59-годишниот политичар е Адолф Хитлер Унона и тој е член на владејачката партија Југозападна африканска народна организација (SWAPO), која е на власт, откако Намибија доби независност од апартхејдот во Јужна Африка во 1990 година.
Хитлер Унона тврди дека „не сфатил што претставува тоа име“. Унона претходно мислел дека ова негово име е „нормално“, сепак, јасно нагласувајќи дека нема никаква врска со криминалната нацистичка идеологија, одговорна за смртта на милиони луѓе. „Татко ми ме крсти по тој човек. Веројатно не разбираше што претставуваше Адолф Хитлер.“ – изјави Унона за германскиот весник „Билд“ во 2020 година.
„Како дете го сметав за сосема нормално име. Дури како тинејџер сфатив дека овој човек сака да го освои целиот свет.“ – имаше кажано тој. Тој посочи дека неговата
сопруга го нарекува Адолф и оти тој самиот вообичаено се претставува како Адолф Унона. Се пожалил дека сега е „премногу доцна“ да го промени своето име, бидејќи се појавува на сите негови официјални документи.
Инаку, Намибија е поранешна германска колонија, поради што многу места, улици, па дури и луѓе сè уште носат германски имиња. Околу 120 илјади Германци ја посетуваат земјата секоја година, а Берлин сè уште тврди дека има „посебна одговорност“ кон Намибија, поради нејзиното „споделено колонијално минато“. Во тој период, меѓу 1904 и 1908 година, германските војници масакрирале околу 65 илјади членови на племето Хереро и 10 илјади членови на племето Нама во задушувањето на бунтот. Контролата врз регионот била преземена од Германската империја на крајот од Првата светска војна.
За разлика од неговиот намибиски имењак Адолф Хитлер бил брутален тиранин, чии обиди да ја освои Европа ја предизвикале Втората светска војна. Откако ја презел власта со Нацистичката партија во 1933 година, неговиот криминален режим извршил геноцид во големи размери, систематски убивајќи шест милиони Евреи во Холокаустот. Сојузниците ги победиле нацистите во 1945 година, а Хитлер извршил самоубиство во својот бункер кога советските сили влегле во Берлин. – објави „Индекс.хр“.