Ракометарите на Вардар и по вторпат му зедоа мерка на Тулуз, совладувајќи го со 37:35 во СЦ „Јане Сандански“, со што ја освоија групата Ф од Европската лига и пренесоа два бода во втората фаза, во која противници ќе им бидат германски Мелсунген и португалска Бенфика.
Најдобриот од таа група ќе обезбеди директно учество во четвртфиналето, а вториот и третиот ќе играат осминафинале.
Гостите од Франција му дадоа силен отпор на двократниот европски првак, добивајќи го првото полувреме со 18:16 и стигнувајќи до максимални 19:16 на стартот од второто, но потоа вардарци се разбудија и со френетичната поддршка од „комитите“ го скршија отпорот на ривалот со водството од 36:31 во 55. минута.
Јака Малус со 9 гола од 12 удари беше најефикасен во составот на Иван Чупиќ, го следеше Дмитро Хориха со 8/14, а голманот Васил Гогов запиша 12 успешни интервенции.