Под мотото „Силна Европа во светот што се менува“, Данска од утре, па до 31 декември 2025 година ќе претседава со Советот на Европската Унија, во кој период ќе работи на изградба на безбедна, конкурентна и зелена Европа.
„ЕУ се соочува со нов меѓународен поредок обележан со неизвесност, глобална стратешка и економска конкуренција и зголемени нивоа на конфликти. Затоа ЕУ мора да биде способна да дејствува самостојно. Силата на ЕУ, меѓу другото, лежи во европското единство, солидна економска основа, стабилни демократии и социјално балансирани општества. Оваа сила мора да продолжи да се развива и да се користи за промовирање и одбрана, како на европските интереси, така и на меѓународниот правен поредок.“ – се наведува во Програмата за работа на Данското претседателство.
Во документот се посочува дека Данското претседателство ќе работи на силна и решителна ЕУ што ја презема одговорноста за сопствената безбедност и за зајакнување на својата конкурентност, за што ќе биде потребно претворање на зборовите во дела и справување со предизвиците со кои се соочува Унијата. Како приоритети на Данското претседавање се наведени зајакнувањето на европската безбедност, подобрувањето на конкурентноста и зачувување на водечката позиција на Унијата во зелената транзиција, за која се вели дека е од суштинско значење за градење побезбедна и поконкурентна Европа.
При претставувањето на приоритетите на Претседателството данската министерка за европски прашања Мари Бјере посочи дека Данска го презема претседавањето со ЕУ, како што се наведува, „во услови на нова геополитичка реалност, со променливи политички ветрови што дуваат од САД и со се поагресивната Русија“„Приоритетите на Владата на Данска во претседавањето со ЕУ се внимателно избрани како одговор на итните предизвици, со кои се соочува Европа. За нас е важно да обезбедиме пред 2030 година Европа да може да се одбрани. Постои итна потреба да се подобри конкурентноста на Европа. Поради овие причини, зајакнувањето на одбраната на Европа и отстранувањето на оптоварувачките регулативи, истовремено со одржувањето на зелената транзиција, ќе бидат два од најважните приоритети за Данското претседателство со ЕУ.“ – изјави Бјере.
Данското претседателство со ЕУ најавува и продолжување на поддршката за Украина и изнаоѓање нови и иновативни решенија за предизвиците на Унијата во врска со нерегуларната миграција за да може да се контролира приливот на илегални мигранти во Унијата. Данска ќе се стреми и за постигнување напредок во рамките на процесот на проширување, за да можат да се преземат конкретни чекори напред во преговорите со земјите кандидатки за членство. „Колку далеку ќе можеме да стигнеме ќе зависи и од самите земји и резултатите, што ќе ги постигнат во сеопфатните реформски процеси, кои ќе ги доближат до ЕУ.“ – се посочува натаму во Програмата за работа на Данското претседателство.
Според Данска, понатамошното проширување на ЕУ е геополитичка неопходност, како единствениот начин ЕУ ефикасно да придонесе за стабилизирање на европскиот континент и зајакнување на отпорноста на земјите ранливи на несакано надворешно влијание. „Затоа, Данското претседателство ќе работи амбициозно на промовирање на проширување на Унијата врз основа на заслуги и ќе ја подготви ЕУ за проширување преку внатрешни реформи. Согласно тоа, Данското претседателство ќе ги унапреди преговорите за проширување со Украина, Молдавија и Западниот Балкан.“ – се истакнува во Програмата.
Во тој документ се посочува дека проширувањето е тесно поврзано со напорите за почитување на фундаменталните вредности на ЕУ за демократија и владеење на правото. „Исто така, ќе работиме на зајакнување и продлабочување на односите на ЕУ со Велика Британија и другите западноевропски земји, кои не се членки на ЕУ.“ – стои во Програмата.
Данска го презема претседавањето со Советот на ЕУ од Полска, чии приоритетите беа поврзани со зајакнувањето на безбедноста на Европа во сите нејзини аспекти, објави Македонската информативна агенција – МИА.
Инаку, на 18 јуни 2025 година при својата посета на Република Македонија и средбата со македонскиот министер за евроинтеграции Орхан Муртезани, министерката за европски прашања на Данска Мари Бјере изјави: „Моментумот е тука, зграпчете го. Ние, како идно претседателство и за време на претседателството, не можеме да го туркаме ова сами. Мора да работиме конструктивно заедно. Заедно со С.Македонија треба да видиме каде можеме да го постигнеме напредокот. Треба напредок да се направи и од С.Македонија, да се преземат чекорите кои се неопходните измени, за да ѝ се придружите на ЕУ.“