Управата за финансиска полиција до Основното јавно обвинителство Делчево поднесе кривична пријава против С.С., директор на Јавното комунално претпријатие „Брегалница“ – ПО Делчево, и против М.К., раководител на сектор во ЈКП „Брегалница“ – ПО Делчево, поради постоење основи на сомнение за сторено кривично дело „несовесно работење во службата“ од Кривичниот законик на Република Македонија.
Првопријавениот С.С. како директор на ЈКП „Брегалница“ – ПО Делчево од 2019 до 2023 година со пропуштање на должниот надзор постапил несовесно во вршењето на своите овластувања и должности, на тој начин што не дал налог за изготвување тужби за парични побарувања од физички и правни лица врз основа на користени услуги, потрошена вода, подигнат смет и закуп на простории од ЈКП „Брегалница“ – ПО Делчево. Поради тоа настапила застареност на паричните побарувања и претпријатието било оневозможено да изврши нивна наплата.
Второпријавениот М.К. како раководител на Секторот за општи, правни и финансиски работи, а подоцна и на Секторот за општи и правни работи во ЈКП „Брегалница“ – ПО Делчево, иако бил должен, не воспоставил соодветен систем на внатрешна контрола и не доставувал редовно предлози за поведување постапки за присилна наплата на ненаплатените побарувања до директорот на претпријатието.
Како што информираат од Управата за финансиска полиција на Република Македонија, со споменатите дејства му е причинета е штета на буџетот на ЈКП „Брегалница“ – ПО Делчево од околу 7 милиони и 600 илјади денари, или околу 123 илјади евра.