На последниот состанок на Претседателството на Алијансата за Албанците (АА) на Арбен Таравари целото раководство поднесе колективна оставка. Како што објаснуваат од партијата, оваа одлука „е донесена за да се отвори патот за реформи и длабока реорганизација“. Таравари останува да ја води партијата како претседател до потврдување на оставките. Одлуката за колективна оставка следи по завршувањето на повторените избори за градоначалник во четири општини, каде што АА настапи во коалиција со ДУИ. Собранието на АА на Таравари се очекува да се одржи кон средината на февруари, а Конгресот на партијата најдоцна до есента оваа година.
Претходно деновиве ДУИ упати повик, како што соопштија, „да им се приклучат на нивната политичка формација сите политички партии во земјата кои се блиски до нивната визија“. По тој повик Таравари во рече дека немаат намера да се претопат во ДУИ. „Немаме ништо заедничко со ДУИ. Ништо! Соработувавме за локалните избори и таа соработка треба да продолжи, но ние имаме наша стратегија која треба да ја подготвиме и да ја претставиме на партиското собрание, кое верувам ќе се одржи на 15 февруари со десетгодишна стратегија на партијата, како и подготовки за конгресот, што најверојатно ќе се одржи на есен. Со ДУИ имаме и ќе имаме соработка, но за спојување воопшто не размислуваме, бидејќи тие се левичарска партија, а ние сме десничарска.“ – изјави Таравари.