Нула нето емисии на јаглерод до 2050 година, е целта на ТИТАН Усје, рече главниот извршен директор Константинос Николау на средбата со претседателот на Стопанската комора Бранко Азески. Компанијата, како што напомена Николау, придонесува со преку 50 милиони евра во македонската економија.
- Безбедноста и здравјето за нас се приоритет и клучна определба. Уделот на јаглерод во нашите производи е сведен на минимум. Тоа е одраз на нашата грижа за животната средина, истакна директорот.
Групацијата Титан во светски рамки има преку 6 000 вработени, а Титан Усје брои повеќе од 500 директни и индиректни вработувања и дополнително, соработува со над 3 000 добавувачи.
- Во последните шест години Титан Усје инвестираше 36 милиони евра од кои 4,5 милиони за подобрување на оперативното работење и еколошките стандарди. Секоја година реализираме по 6 – 9 милиони евра инвестиции. Следните три години планираме вложувања од 30 милиони евра, подвлече Николау, додавајќи дека повеќе од 70 години Титан Усје е дел од заедницата и има А интегрирана дозвола.
Според него, во Титан Усје се применуваат најдобрите индустриски практики. Азески рече дека ја остварува посетата во сензитивен период, кога компанијата, како што рече, е нападната од јавноста. Тој повика на дијалог и во овој контекст понуди поддршка од Комората.
- Треба да докажеме дека имаме капацитет за опстанок, за контролирање на ситуациите и за интеграција. Мислам дека тој испит ќе го положиме зашто враќање назад нема. Мора да се разговара за да се надминат проблемите. Тоа е единствениот начин. Придонесот на оваа компанија во државата е голем, Групацијата се шири, што потврдува дека е силна и дека работи согласно законите, потенцира Азески.
Тој оцени дека овој случај конечно го отвори клучното прашање – заштитата на животните средина и развојот на индустријата.
- Дојдов тука кога наша членка е нападната од јавноста. Не бегам од тоа, дојдов да изразам поддршка на менаџментот. Треба да имаме вин-вин ситуација, државата да овозможи компаниите да остваруваат профит, во условите на максимално заштитена животна средина. Големи мултинационални компании се тука, а тоа значи дека ја гарантираат стабилноста на државата и на системот.
Ќе ја прифатиме инцијативата на Усје за организирање конференција за ова прашање за трасирање на патот на напредокот.