Косопственикот на барот „Констеласион“ во Кран-Монтана, Швајцарија, Жак Морети, кој беше приведен за време на истрагата за пожарот во објектот во кој загинаа 40 лица за време на новогодишната прослава на 1 јануари, е ослободен со кауција, соопшти денеска судот во Вале.
Морети беше во притвор од 9 јануари, а судот за присилни мерки ја потврди неговата тримесечна затворска казна три дена подоцна, но адвокатите на одбраната поднесоа барање за ослободување на Морети во замена за неколку услови, вклучително и плаќање кауција од околу 215.000 евра, објавува „Ле Фигаро“.
Судот во соопштението наведува дека на Жак Морети му е „забрането да ја напушти швајцарската територија“, дека е ослободен под услов „да ги предаде сите лични документи“ и дека е „обврзан да се јавува во полициската станица секој ден“.
Адвокатите на семејствата на жртвите, кои беа многу критични кон начинот на кој швајцарските кантонални власти досега го водеа случајот, изјавија дека одлуката за ослободување на Жак Морети била „неочекувана“ и „зачудувачка“, пишува „Фигаро“.
„Ова е неочекувано и особено зачудувачко за мојот клиент и за семејствата на жртвите. Поминаа едвај три недели од трагедијата. Истрагата тукушто започнува“, изјави адвокатот Кристоф де Галамберт за „Фигаро“.
Пожарот во барот во Кран-Монтана, за кој првично беше утврдено дека е предизвикан од распрскувачи на шишиња шампањ што келнерите ги носеа високо над главите, уби 40 лица, а повреди 116.