Со највисоки државни и воени почести денеска во вила „Водно“ претседателката на Македонија, Гордана Сиљановска-Давкова го пречека својот албански колега Бајрам Бегај, кој е во официјална посета на земјава.
По пречекот тие имаа тет-а-тет средба, а потоа и пленарен состанок на македонската и албанската делегација.
Во фокусот на разговорите беа севкупните билатерални односи, кои се традиционално пријателски и партнерски, како и можностите за нивно понатамошно продлабочување во повеќе сфери од заемен интерес.
Соговорниците разменија мислења за европските аспирации на двете држави, соработката во рамките на НАТО алијансата и актуелната безбедносна состојба на европскиот континент, како и за соработката во рамки на регионалните иницијативи.
Беше изразена подготвеност за натамошно унапредување на политичкиот дијалог и институционалната соработка, во интерес на граѓаните на двете држави.
Се очекува Сиљановска-Давкова и Бегај да имаат и заедничка прес-конференција.
За време на посетата, претседателот Бегај ќе положи венец на гробот на Гоце Делчев во црквата „Свети Спас“ во Скопје.
Според агендата на официјалната посета, албанскиот претседател ќе има средба и со претседателот на Собранието, Африм Гаши, а потоа и ќе се обрати пред пратениците.
Претседателот на Албанија посетата на земјава ја започна вчера со посета на Општина Чаир.
За утре е најавена посета на албанскиот претседател на Тетово, за што преку објава на Фејсбук информира градоначалникот на Општината, Билал Касами.