Потпретседателката на Главниот одбор на Српската напредна странка (СНС), Ана Брнабиќ, се обрати од зградата на Претседателството на Србија, во својство на вршител на должноста претседател на Република Србија.
„Она на што сме сведоци од изборната ноќ е недозволиво и не смее да продолжи“, рече Брнабиќ на почетокот на обраќањето.
Таа ја свика прес-конференцијата за уште еднаш да повика на разум, мир, почитување на Уставот и законите на Република Србија, како и на почитување на институциите.
„Повикувам на основна човечка пристојност и почитување на достоинството на секој човек во оваа земја. Она на што сме сведоци во последните неколку дена – од моментот кога беа објавени резултатите од вонредните парламентарни избори, односно од вечерта на 25 октомври – е апсолутно неприфатливо и не смее да продолжи“, изјави Брнабиќ.
Таа оцени дека некои покажале одговорност во поразот, а некои неодговорност во победата, и ги повика сите на мир.
„Победивте, формирајте власт, не дозволувајте насилници да нè малтретираат. Ова не е владеење на правото, ова е владеење на теророт“, рече Брнабиќ, наведувајќи ги упадите во „Информер ТВ“ и „Пинк“.
Одговарајќи на новинарски прашања, Брнабиќ изјави дека, согласно Уставот, претседателските избори ќе бидат распишани најдоцна до 27 ноември.